Durchlüchtiger hochgeborner fürst sonder gnaediger herre üwern fürstlichen gnaden syent unser undertaenig willig dienst und waz wir eren liebs und guotz vermoegen zuo vor an berait. Gnaediger herre, als wir denn vormalß üwern fürstlichen gnaden von unsers burgers Hainrich Lenmans, so man nempt Vogel waider, geschriben haben, wie der mit sampt andern sins gewerben von Oesterich komen, in willen haimzuoziechen, so syen inen by Baer bach in der graven von Schomburg land sybenzechen pfaerdt genomen und im darunder ain graw und ain rot schimel mitsampt zwaien nüwen saetteln, ainer armbrost, ainer taeschen und darinn ain gulden ringg und an silber und an gold, das im lieber waer denn zway hundert ungerischer guldin, und soeliches allen komen und gemaine sag, das grauff Bernhart von Schomburg nit abred, daz soelich uffhebung durch inn ald in sinem namen beschehen sye etc. Uff das wir üwer fürstlich gebetten, mit demselben grauff Bern harten, oder an wem das gelegen sye, zeverschaffen und daran zuosind, das dem unsern sin hab und guot anverziechen och onengaltnusß ledig gelaussen und bekert wurden. Üwer fürstlich gnad daruff gemainer aidgnossen rautzfründen in geschrifft gnaedigen willen mit antwurt erzaigt, das wir mit guotem willen von den unsern wegen in aller gebürlichait zuoverdienen willig sin woellend, und wie die sach vormalß an graff Bernharten gezogen ist durch unrecht berichtung des toffnamens misßschriben und also uff graff Wolffgangen von Schomburg ergangen zuoverstaend, der üwer fürstlichen gnaden diener und in pfleg ampt ver pflicht ist. Hierumb so bitten wir üwer fürstlichen gnad mit undertaenigem und ernstlichem flizze, die wil die ding von üwer fürstlichen gnaden diener und amptman, graff Wolff gangen von Schomburg, oder den sinen beschechen, wir ouch vernemen, das der unser bericht sye, daz die zway pfaerdt, so sin sind, in graff Bernhartz stall sollen stan zuo nüwen huff gemutzt und andast gebrendt syen worden, mit im fürderlich zuoverschaffen und daran zuo sind, damit unserm burger Hainrichen Lenman sin hab und guot unongaltnusß ledig gelaussen und bekert werde, des wir uff üwerm vorig gnaedig antwurt gemainen aidgnossen rautzfründen gegeben, ain unzwiffenliche hoffnung zuo üwern gnaden haben, das es bescheche. Das begeren wir umb dieselben üwer fürstlichen gnad, wa sich das begeben wurdet, dienstlich undertaeniklich und mit willen zuo verdienen, und begerend daruff üwer gnaedig verschriben antwurt by dem botten. Geben uff frytag nach sant Johans tag baptiste anno domini etc. LXXIIIo. Burgermaister und raut der statt zuo Santgallen.